افتراضي أرفض التهميش ...\
أرفض التهميش ...\
انا ما احب اعيش الا بوضوح واكره التشويش
لذلك جيت لك ودي تحدثني عن الخافي
اذا اصل الحب عندك كم يوم وبعدها تطنيش
حرام انك تعيّش بالتفاهه قلبي الوافي
انا حبيتك الرجل الذي فارق زمان الطيش
وانا حبيتك الشهم الشجاع الصادق الصافي
انا حبيتك اللي لا خطيت يقول لي معليش
وانا حبيتك اللي شال حزن ٍ متعب اكتافي
ولكنك غديت اليوم متغيّر ولا ادري ليش
ولا ادري ويش جمد ياغناتي وصلك الدافي
صحيح احيان نحتاج انتساهل بس عشان نعيش
ولكني اموت ان صرت بتساهل مع الجافي
ترا حتى ولو فارقتني يا صاحبي حتيش
مدامك منت اول من يخون الود يا كافي
ومدامك ما رحمت القلب جيته مع همومه جيش
تغافلته رغم حبه بطعنه يوم هو غافي
اجل اعيش لك وابقى معك ياصاحبي لجل ايش؟
واشوفك ما رحمت الرعشه اللي تسكن اطرافي
انا لو ما اكون اصل المحبه ارفض التهميش
وانا من وقتها بمشي بعد ما طال ميقافي
ترا واضح من اسلوبك بان كل مقصدك تطفيش
كذا طاح الستار وبان لي كل الذي خافي
