قلبـــى إنفطــــــر
أرجع تعال لى ياقمر .. أرجع كفايه عليك سفر
ريح قليبى المنكسر .. راجياك تعوضنى السهر
إشتقت لى شوفتك كتير .. زى لهفة الناس للمطر
أترجى طيفك كل حين .. تغمرنى لحظات السمر
عاهدنى يا أغلى البشر .. أصلو الفراق أقسى وأمر
حاسباو غيابك بالشهر .. حارقنى بالسر والجهر
بدل الدموع كبيت مطر .. مديت عليك حبل الصبر
قصيت ضفايرى عليك حزن .. وضفرت من الشوق شعر
كلمت ليك سرب الحمام .. يرسم خيالك فى الشجر
رسلت ليك كل البشر .. وصيتم عليك نفر .. نفر
كل الحروف خافت حذر .. كل الكلام مات .. إنتحر
لسه القليب ليك منتظر .. بالأنتظار ملّ وفتر
كايس عليك مدّ البصر .. يا حسره يا قلبى .. إنفطر