خوية درب عمري ما خذاني دونها النسيان
وانا ياهل الملامة ما رغبت العيش وحداني
ابيها مهرة ماعسفت صغيرة وبنت حصان
ابوها اللي يفك المشكلة ويزبن الجاني
واخوها لا تعزوى باسمها فزوا له العربان
يحق لها الفخر في قولة الا فلان جـداني
ابيها في بحر عشرين لا زود ولا نقصان
ابيها اقصر طويلة والوصوف اشكال والواني
ابي الجبهة كما الصبح وكما القوس اسود الحجان
وابيها ناعسات ونرجسية سود الأعياني
ابي رمش كما ريش يغطي الثلج في الأوجان
وابي جفن يشيل الرمش طربان وكسلاني
وابي خد مثل ورد تنمى في طرف بستان
وابي خشم صغير ومثل حد السيف شاماني
ابي البسمة كما البرق وثناياها كما المرجان
وشفاها جمرتين وفمها خاتم سليماني
ابي شعر كما ذيل الفرس لا طبت الميدان
او الشلال لامن بات ليلة بين الأمتاني
ابي جيد سواها ابريق فضة ناتق ومليان
وصدر كنة مراية عليها طلع رماني
ابي ظهر كما الجدول وقد مثل غصن البان
وخصر مثل مجدول العنان وجسم روياني
ابيها نابية ردف وبطن ضامر جوعان
ابيها مدمجة ساق وقدمها لسان ثعباني
ابيها بنت عز من رغدها ينعم الفستان
ابي الرقة وابي الدقة لها باطرافها شاني
ابي المشية كما اللى طالع من المعركة كسبان
وابيها ترش مع خطواتها مسك وريحاني
ابي صوت الى منى سمعتة كن فيه الحان
يدغدغ مسمعي ويثير كل السحر فـ اشجاني
ابيها حب واخلاص وهواجيس وفرح واحزان
ابيها مثل ما دكتور اهالي العشق وصاني
ابيها لوحة ما صورتها ريشة الفنان
ابيها جوهرة ما جابها قاصي ولا داني
ابيها تنتصر لى من زمان حطني نيثان
وتبشر بالغلا اللى ما لقابه واحدٍ ثاني
مهرها قلب وشعر يهز القلب والوجدان
والبسها القصيد وتصبح اوزاني وقيفاني
ابي اللي فات صعب ومن لقى العنوان
يرد العلم والا افضل ابقى اعيش وحداني
[b]
